काभ्रेपलाञ्चोक — समाजमा देखिने धेरै समस्याबारे किशोर–किशोरीहरू प्रायः छलफल गर्छन्, तर ती समस्याको समाधान खोज्ने प्रक्रियामा उनीहरूको प्रत्यक्ष सहभागिता भने कमै देखिन्छ। यही खाडललाई कम गर्न काभ्रेको बनेपामा एउटा नयाँ पहल सुरु भएको छ — ‘प्रोजेक्ट शिफ्ट’।
अन्तर्राष्ट्रिय महिला दिवसको अवसर पारेर सुरु गरिएको यो कार्यक्रमले विशेषगरी विद्यालय तहमा अध्ययनरत छात्रा विद्यार्थीहरूलाई सामाजिक मुद्दाबारे बुझ्ने, विश्लेषण गर्ने र समाधान खोज्ने क्षमतामा सशक्त बनाउने लक्ष्य लिएको छ।
कार्यक्रम Secondbench को आयोजनामा बनेपा नगरपालिका र CQ University Australia को सहकार्यमा सञ्चालन गरिएको हो। बनेपास्थित ज्ञानकुञ्ज शैक्षिक प्रतिष्ठानमा सुरु गरिएको कार्यक्रममा विभिन्न विद्यालयका छात्रा विद्यार्थीहरू सहभागी भएका छन्।
कार्यक्रमको मुख्य उद्देश्य किशोरीहरूलाई समाजमा विद्यमान विभिन्न समस्या र चुनौतीबारे जानकारी गराउनु मात्र होइन, ती समस्याको समाधानका लागि नेतृत्वदायी भूमिका खेल्न प्रेरित गर्नु पनि हो।
प्रशिक्षणअन्तर्गत सहभागी विद्यार्थीहरूलाई सामाजिक मुद्दाको पहिचान, समस्या विश्लेषण, आलोचनात्मक सोच विकास र सम्भावित समाधानका उपायबारे सिकाइनेछ। करिब १५ घण्टा लामो प्रशिक्षण तथा अन्तरक्रियात्मक सत्रमार्फत कार्यक्रम सञ्चालन भइरहेको आयोजकले जनाएको छ।
कार्यक्रममा समूहगत छलफल, प्रस्तुतीकरण, अन्तरक्रिया र व्यावहारिक अभ्यासलाई प्राथमिकता दिइएको छ। यसले विद्यार्थीलाई केवल सैद्धान्तिक जानकारी मात्र होइन, व्यवहारिक रूपमा पनि सामाजिक विषयमा सक्रिय हुन प्रोत्साहित गर्ने लक्ष्य राखिएको छ।
आयोजक संस्थाका प्रतिनिधिहरूका अनुसार विद्यालय तहबाटै नेतृत्व विकासका कार्यक्रम सञ्चालन गर्न सके भविष्यमा सक्षम, जिम्मेवार र सचेत महिला नेतृत्व तयार गर्न महत्वपूर्ण योगदान पुग्न सक्छ।
“किशोरीहरूलाई सशक्त बनाउने उद्देश्यले यस्तो कार्यक्रम सञ्चालन गरिएको हो। विद्यालय स्तरबाटै सामाजिक विषयमा सोच्ने र नेतृत्व गर्ने क्षमता विकास गर्न सकियो भने उनीहरू भविष्यमा समाजका महत्वपूर्ण परिवर्तनकर्ता बन्न सक्छन्,” आयोजक पक्षले जनाएको छ।
यस्ता कार्यक्रमलाई आगामी दिनमा पनि निरन्तरता दिने योजना रहेको आयोजकले बताएको छ।
कार्यक्रममा सहभागी छात्रा विद्यार्थीहरूले पनि यस्तो पहलले सामाजिक विषयमा आफ्नो बुझाइ विस्तार गर्न सहयोग पुगेको बताएका छन्।
उनीहरूका अनुसार कार्यक्रमले सामाजिक समस्या कसरी पहिचान गर्ने, त्यसबारे खुला रूपमा छलफल गर्ने र समाधानका सम्भावित उपाय प्रस्तुत गर्ने अवसर दिएको छ।
“हामीले समाजमा देखिने समस्याबारे पहिले पनि सोच्थ्यौँ, तर यहाँ आएपछि त्यसलाई विश्लेषण गरेर समाधान कसरी खोज्ने भन्ने सिक्न पाएका छौँ,” एक सहभागी छात्राले भनिन्।
यस्ता गतिविधिले विद्यार्थीहरूमा आत्मविश्वास बढाउनुका साथै सामाजिक उत्तरदायित्वप्रति संवेदनशीलता पनि विकास हुने विश्वास गरिएको छ।
अन्तर्राष्ट्रिय महिला दिवसको सन्दर्भमा सुरु गरिएको ‘प्रोजेक्ट शिफ्ट’ कार्यक्रमले किशोरीहरूलाई सशक्त बनाउँदै समाजमा सकारात्मक परिवर्तन ल्याउन सहयोग पुग्ने अपेक्षा गरिएको छ।
साथै विद्यार्थीहरूलाई सामाजिक जिम्मेवारीबोधका साथ सक्रिय नागरिकका रूपमा विकास गर्न यस्तो कार्यक्रम प्रभावकारी हुने विश्वास आयोजकको छ।
स्थानीय तह, शैक्षिक संस्था र अन्तर्राष्ट्रिय सहकार्यको समन्वयमा सुरु गरिएको यो पहलले किशोरीहरूलाई समाज बुझ्ने मात्र होइन, समाज परिवर्तन गर्ने नेतृत्वको रूपमा तयार पार्ने प्रयास गरेको देखिन्छ।
खुसी
दुःखी
अचम्मित
उत्साहित
आक्रोशित
