काभ्रेपलाञ्चोक/ प्राविधिक तथा व्यवसायिक सीप हासिल गरेका युवालाई लक्षित गर्दै पर्ल ब्यूटी पार्लर ट्रेनिङ सेन्टर र रक्षा टेलर्स एण्ड ट्रेनिङ सेन्टरबाट प्रशिक्षण लिएका सफल प्रशिक्षार्थीहरूलाई सीप परीक्षण (स्किल टेस्ट) प्रमाणपत्र प्रदान गरिएको छ। प्राविधिक शिक्षा तथा व्यावसायिक तालीम परिषद् (सिटिइभिटी) बाट मान्यता प्राप्त पर्ल ब्यूटी पार्लरमा तालिम लिएका तथा सिटिइभिटीबाट सीप परीक्षण (स्किल टेस्ट) मा उत्तीर्ण भएका प्रशिक्षार्थीहरूलाई प्रमाणपत्र वितरण गरिएको हो। प्रशिक्षार्थीहरूलाई प्रमुख अतिथि एवं बनेपा नगरपालिकाका प्रमुख शान्तिरत्न शाक्य, विशिष्ट अतिथि उपप्रमुख विमला सापकोटा दाहाल, बनेपाका वडाध्यक्षद्वय हिटलर शाक्य र शुभलक्ष्मी मानन्धर तथा नवरत्न टेक्निकल ट्रेनिङ इन्स्टिच्यूटका निर्देशक भरतमणि अर्यालले प्रमाणपत्र वितरण गरेका थिए । कार्यक्रममा तालिम पूरा गरेका ७० जना प्रशिक्षार्थीहरूले औपचारिक रूपमा आफ्नो सीपको मान्यता पाएका हुन्। पर्ल ब्यूटी पार्लर ट्रेनिङ सेन्टरकी सञ्चालिका रामेश्वरी मानन्धरका अनुसार सौन्दर्यसम्बन्धी व्यावहारिक ज्ञान र सीप विकास गराउने उद्देश्यले सञ्चालन गरिएको तालिमले सहभागीहरूलाई रोजगारी तथा आत्मनिर्भरतातर्फ उन्मुख गराउने अपेक्षा गरिएको छ। प्रशिक्षण अवधिमा विद्यार्थीहरूलाई हेयर स्टाइलिङ, फेसियल, स्किन केयर, मेकअप लगायतका विभिन्न विषयमा व्यावहारिक अभ्यास गराइएको थियो। त्यसपछि सिटिइभिटीको मापदण्डअनुसार गरिएको परीक्षणमा सफल भएकाहरूलाई लेभल–१ प्रमाणपत्र प्रदान गरिएको उनले बताइन्। कार्यक्रममा बोल्दै प्रमुख अतिथि शाक्यले आजको समयमा सीपमूलक शिक्षा अत्यन्त महत्वपूर्ण बन्दै गएको उल्लेख गरे। यस्ता तालिम कार्यक्रमले बेरोजगारी घटाउन सहयोग पुग्नुका साथै युवालाई उद्यमशील बनाउन टेवा पुग्ने उनले धारणा राखे। प्रमाणपत्र प्राप्त गरेका विद्यार्थीहरूले आफूले सिकेको सीपलाई व्यवसायमा रूपान्तरण गर्ने योजना बनाएको बताएका छन्। केहीले आफ्नै पार्लर सञ्चालन गर्ने लक्ष्य लिएको उल्लेख गर्दै तालिमले व्यवहारिक ज्ञान प्राप्त गर्न सहयोग पुगेको बताए। आयोजक दुबै संस्थाले आगामी दिनमा पनि यस्ता सीपमूलक तालिम तथा प्रमाणपत्र वितरण कार्यक्रमलाई निरन्तरता दिने जानकारी दिएको छ। सीप विकासमार्फत आर्थिक सशक्तीकरण र रोजगारी सिर्जनामा योगदान पुर्याउने लक्ष्यसहित कार्यक्रम सञ्चालन गरिएको बताइएको छ।...
