काभ्रेपलाञ्चोक/ बनेपास्थित स्मार्ट प्यालेसमा आयोजित भव्य समारोहबीच ज्ञानकुञ्ज शैक्षिक प्रतिष्ठान अन्तर्गत ज्ञानकुञ्ज किन्डर गार्टेनका यु.के.जी. तहमा अध्ययनरत ५३ जना विद्यार्थी दीक्षित भएका छन्। कार्यक्रम प्याबसन केन्द्रीय सचिवालय सदस्य हिरा शर्मा नेपालको प्रमुख आतिथ्यमा सम्पन्न भएको हो। स्वागत मन्तव्यका क्रममा प्रबन्ध निर्देशक वैद्यले संस्थाले बालमैत्री वातावरणमा बाल मनोपरामर्शदातासहित शिक्षण–सिकाइ प्रक्रिया सञ्चालन गर्दै आएको जानकारी दिए। उनले आगामी शैक्षिक सत्र २०८३ मा शैक्षिक उत्कृष्टतासँगै नेतृत्व विकास, भावनात्मक व्यवहार, सम्बन्ध निर्माण र जीवनोपयोगी सीप अभिवृद्धिका कार्यक्रमलाई थप सशक्त बनाइने बताए। उनका अनुसार संस्थाले पाठ्यपुस्तकमा सीमित नभई व्यवहारिक शिक्षालाई विशेष प्राथमिकता दिएको छ। विद्यार्थीहरूलाई कृषि, तरकारी खेती, कुकिङ, सिलाइ–बुनाइ, अचार, गुन्द्रुक, मस्यौरा निर्माण तथा मौसमी फलफूल संरक्षणजस्ता सीप सिकाइँदै आएको छ। यसबाट बालबालिकामा सानैदेखि उद्यमशीलता, बचत र समय व्यवस्थापनप्रतिको चेतना विकास हुने विश्वास गरिएको छ। संस्थाले प्ले ग्रुपदेखि स्नातकोत्तर तहसम्मको अध्ययन–अध्यापन एकै छानामुनि सञ्चालन गर्दै सक्षम जनशक्ति उत्पादन गर्ने लक्ष्य लिएको वैद्यले बताए। साथै, शैक्षिक वर्ष २०८२ मा सयौँ विद्यार्थीलाई ३५ लाख रुपैयाँ बराबरको छात्रवृत्ति प्रदान गरिएको जानकारी पनि उनले दिए। कार्यक्रमका सभापति तथा सञ्चालक सदस्य आत्माराम थापाले आधुनिक शिक्षण पद्धति, वैज्ञानिक दृष्टिकोण र बालमैत्री वातावरणका कारण विद्यालय अभिभावकमाझ लोकप्रिय बन्दै गएको उल्लेख गरे। उनले दीक्षित विद्यार्थीहरूलाई बधाई दिँदै उज्ज्वल भविष्यको कामना व्यक्त गरे। सहायक प्रिन्सिपल नमराज दाहालले विद्यालयले एक वर्षमा हासिल गरेका उपलब्धिहरू सार्वजनिक गर्दै अध्ययन, खेलकुद र संगीतमा उत्कृष्ट विद्यार्थीहरूलाई सम्मान गरिएको जानकारी दिए। कार्यक्रममा किन्डर गार्टेनका विद्यार्थीहरूले सांस्कृतिक तथा सिर्जनात्मक प्रस्तुति प्रस्तुत गरेका थिए। अभिभावकहरूले यस्ता कार्यक्रमले बालबालिकाको आत्मविश्वास र व्यक्तित्व विकासमा सकारात्मक प्रभाव पार्ने विश्वास व्यक्त गर्दै आगामी दिनमा पनि यस्ता शैक्षिक तथा अतिरिक्त क्रियाकलापलाई निरन्तरता दिन आग्रह गरेका छन्। समारोहमा प्रतिष्ठानका प्रबन्ध निर्देशक प्रताप वैद्य, सञ्चालक आत्माराम थापा, सहायक प्रिन्सिपल, नेपाल पत्रकार महासंघ काभ्रेका अध्यक्ष, प्याबसन तथा एन–प्याबसनका पदाधिकारी, पत्रकार, अभिभावक, शिक्षक–शिक्षिका लगायतको उल्लेखनीय उपस्थिति रहेको थियो।...
