काभ्रेपलाञ्चोक — धुलिखेल अस्पतालको कान, नाक, घाँटी तथा टाउको–घाँटी शल्यक्रिया (इएनटी–एचएनएस) विभागले दक्षिण कोरियाको सियोल नेसनल युनिभर्सिटी अस्पतालको इएनटी–एचएनएस विभागसँगको सहकार्यमा ५औँ बाल श्रवण पुनःस्थापना कार्यशाला तथा ४औँ टेम्पोरल बोन डिसेक्सन कार्यशाला मिति २०२६ जनवरी २१ र २२ मा सफलतापूर्वक सम्पन्न गरेको छ।
दुई दिने शैक्षिक कार्यक्रममा बालबालिकाको श्रवण उपचारको समग्र विकासमा जोड दिइएको थियो। कार्यक्रममा श्रवण समस्या पहिचानको प्रारम्भिक चरणदेखि कक्लियर इम्प्लान्ट तथा त्यसपछिको पुनःस्थापना प्रक्रियासम्मका विषयवस्तु समेटिएका थिए।
साथै, टेम्पोरल बोन डिसेक्सन कार्यशालामार्फत इएनटी सर्जन तथा रेसिडेन्ट चिकित्सकहरूलाई उन्नत ओटोलोजिक शल्यक्रियासम्बन्धी व्यवहारिक (ह्यान्ड्स–अन) तालिम प्रदान गरिएको थियो, जसले जटिल कान शल्यक्रियामा उनीहरूको दक्षता अभिवृद्धि गरेको आयोजकले जनाएको छ।
कार्यक्रमका अवसरमा बोल्दै धुलिखेल अस्पताल ENT–HNS विभागका प्रमुख डा. विकासलाल श्रेष्ठले आफ्नो विभागका लागि यी कार्यशालाहरू अर्को गर्विलो उपलब्धि भएको बताए। दुवै कार्यक्रमको सफल सम्पन्नताले नेपालमा बाल श्रवण सेवा तथा शल्यक्रियात्मक उत्कृष्टता प्रवर्द्धन गर्ने विभागको प्रतिबद्धता पुनः पुष्टि गरेको उहाँले उल्लेख गर्नुभयो।
“व्यक्तिगत प्रतिबद्धता सामूहिक प्रयासमा जोडिँदा नै टिम सफल हुन्छ,” डा. श्रेष्ठले भन्नुभयो।
उहाँले सहकर्मी चिकित्सकहरू, नर्सिङ स्टाफ, फेलो, रेसिडेन्टहरू तथा अस्पतालका आईटी र मर्मतसम्भार टिमप्रति समर्पण र उत्कृष्ट समन्वयका लागि हार्दिक धन्यवाद व्यक्त गर्दै यो सफलता सबैको साझा उपलब्धि भएको बताउनुभयो।
कार्यशालामा राष्ट्रिय तथा अन्तर्राष्ट्रिय प्रशिक्षक, सहभागी तथा साझेदारहरूको सहभागिता रहेको थियो, जसले शैक्षिक सहकार्य र सीप आदान–प्रदानलाई थप मजबुत बनाएको धुलिखेल अस्पतालले जनाएको छ।
सियोल नेसनल युनिभर्सिटी अस्पतालसँगको निरन्तर सहकार्यले नेपालमा बाल श्रवण सेवा तथा उन्नत कान शल्यक्रियाको क्षमता अभिवृद्धि गर्न महत्वपूर्ण भूमिका खेलिरहेको र यसबाट देशभरका श्रवण समस्या भएका बालबालिका प्रत्यक्ष रूपमा लाभान्वित हुने अपेक्षा गरिएको छ।
खुसी
दुःखी
अचम्मित
उत्साहित
आक्रोशित
