काभ्रेपालञ्चोक / पनौती नगरपालिकाका सम्पूर्ण वडा कार्यालय, स्वास्थ्य चौकी, अस्पताल, शहरी स्वास्थ्य केन्द्र तथा नगरभित्रका सबै विद्यालयमा नेपाल टेलिकमको एफटीटीएच (फाइबर टु द होम) कर्पोरेट सेवा प्रयोग गर्ने विषयमा नेपाल टेलिकम बनेपा र पनौती नगरपालिकाबीच समझदारीपत्र (एमओयू) मा हस्ताक्षर भएको छ।
समझदारीपत्रमा पनौती नगरपालिकाका तर्फबाट नगर प्रमुख रामशरण भण्डारी र नेपाल टेलिकम बनेपाका प्रमुख ई. जगदीश लेखकबीच हस्ताक्षर भएको हो।
उक्त सम्झौतापछि नगरपालिकाअन्तर्गतका कार्यालय तथा शैक्षिक–स्वास्थ्य संस्थामा उच्च गतिको, भरपर्दो र सुरक्षित इन्टरनेट तथा सञ्चार सेवा विस्तार हुने अपेक्षा गरिएको छ।
नगर प्रमुख भण्डारीले डिजिटल सुशासन, प्रविधिमैत्री सेवा प्रवाह तथा शैक्षिक र स्वास्थ्य क्षेत्रमा सूचना प्रविधिको प्रभावकारी उपयोगका लागि यो सम्झौता महत्वपूर्ण हुने बताए।
पनौती नगरपालिकाको आ.ब.२०८२/०८३ को नीति तथा कार्यक्रम अन्तर्गत पनौती नगरपालिका सहित १२ वटै वडा कार्यालय, सबै स्वास्थ्य संस्था र सबै सामुदायिक बिद्यालयमा ईन्टरनेट सेवा प्रदान गर्न जिटुजी सेवा अनुसार नेपाल टेलिकमसंग समझदारीपत्रमा हस्तान्तरण भएको भण्डारीको भनाई छ ।
नेपाल टेलिकम बनेपाका प्रमुख लेखकले पनि पनौती नगरपालिकाका सरकारी तथा सार्वजनिक संस्थालाई गुणस्तरीय कर्पोरेट इन्टरनेट सेवा उपलब्ध गराउने प्रतिबद्धता जनाएका छन् ।
सम्झौतासँगै पनौती नगरपालिकामा डिजिटल पूर्वाधार सुदृढ भई सेवा प्रवाह छरितो, प्रभावकारी र प्रविधिमैत्री हुने विश्वास गरिएको छ।
खुसी
दुःखी
अचम्मित
उत्साहित
आक्रोशित
२०८२ फाल्गुन २७ गते
