काठमाडौँ/ नेपालको ऐतिहासिक सम्पदा संरक्षण र दिगो पर्यटनलाई नयाँ उचाइमा पुर्याउने उद्देश्यका साथ ‘फोर्ट स्टेज राइड’ को सम्भाव्यता अध्ययन तथा अभियान सुरु भएको छ। स्टोरीसाइकल र समृद्ध सिन्धुली अभियानको संयुक्त पहलमा सुरु भएको यस अभियानले बागमती प्रदेशका १५ वटा स्थानीय तह र ऐतिहासिक गढीहरूलाई एउटै सूत्रमा जोड्नेछ।
३९० किलोमिटर लामो यो पर्यावरण मैत्री साइकल ट्रेलले ऐतिहासिक गढीहरूको पुनर्जागरण गर्दै ‘न्यून कार्बन पर्यटन’को अवधारणालाई अघि सारेको छ।
अभियानका टोली प्रमुख दिपक श्रेष्ठका अनुसार विगतका गहन अध्ययनहरूका आधारमा यो कार्य अघि बढाइएको हो। यो अध्ययन मुख्यतया तीन क्षेत्रमा केन्द्रित रहनेछ:
अध्ययन टोलीका सदस्य तथा जनस्वास्थ्य विज्ञ दीप राजा थापाले यो अभियानले शारीरिक र सामाजिक सुस्वास्थ्यलाई समेत प्रवर्द्धन गर्ने बताउनुभयो। उहाँका अनुसार पर्माकल्चर, माइन्डफुलनेस र स्थानीय इतिहासलाई विश्वभरका पर्यटकमाझ पुर्याउन साइकल भ्रमण एक उत्कृष्ट माध्यम हो।
त्यस्तै, नेपाल साइकल संघका सचिव तथा प्राविधिक टोली प्रमुख देवेन्द्र बस्नेतले यस ट्रेलले नेपालमा लामो दूरीको साहसिक साइक्लिङ खेल र वातावरण मैत्री पर्यटनको दोहोरो सम्भावनालाई उजागर गर्ने उल्लेख गर्नुभयो।
यसअघि समृद्ध सिन्धुली अभियानले अध्ययन गरेको ‘एकीकरण पदमार्ग’ र नमोबुद्धदेखि फिक्कलसम्मको ‘ग्रेट महाभारत ट्रेल’लाई संयोजन गरी यो नयाँ चक्रिय मार्गको विकास गरिएको हो। स्टोरीसाइकलका सौरभ ढकाल भन्नुहुन्छ, “विगतका विभिन्न रुटहरूको सम्भाव्यता अध्ययनपछि अहिले तिनलाई एकीकृत गरी चक्रिय मार्गको रूपमा विकास गर्न जुटेका हौँ।”
यो अध्ययन यात्रा ललितपुर महानगरपालिका वडा नं. ६, कनिबहालबाट सुरु भएर लुभु – लामाटार – पनौती – नमोबुद्ध – बालुवाटार – हायुगाउँ – कोटगाउँ – बन्दीपुर – नागी मजुवा – सिन्धुलीगढी – सिन्धुलीमाढी – मरिण – पञ्चकन्या पोखरी – घण्टे – हरिहरपुरगढी – फापरबारी – फूर्केचौर – मकवानपुरगढी – टीकाभैरव हुँदै पुनः कनिबहालमै पुगेर टुङ्गिनेछ। यस यात्राले बागमती प्रदेशका ऐतिहासिक किल्ला र प्राकृतिक सौन्दर्यलाई समेट्नेछ।
खुसी
दुःखी
अचम्मित
उत्साहित
आक्रोशित
