काभ्रेपलाञ्चोक/ पाँचखालस्थित सशस्त्र प्रहरी बल नेपाल १५ नम्बर गण हेडक्वाटरले काभ्रेपलाञ्चोकमा विपद् प्रतिकार्य स्वयंसेवकको तयारीका लागि विपद् स्वयंसेवक आधारभूत तालिम तथा विपद् सूचकसम्बन्धी अभ्यास गराउन थालेको छ । हेडक्वाटरले आजदेखि पनौतीबाट उक्त अभ्यास गराउन थालेको हो ।
प्रहरीले पनौती नगरको सहकार्यमा नगरभित्रका १२ वडाका ४० जनालाई आजदेखि विपद् स्वयसेवक आधारभूत तालिम र विपद् सूचकसम्वन्धी अभ्यास गराउन सुरू गरेको हो । अभ्यासको प्रमुख जिल्ला अधिकारी उमेशकुमार ढकालले शुभारम्भ गर्दै हरेक नागरिक विपद्सँग परिचित हुनुपर्ने उल्लेख गर्दै विपदपछिका अवस्था, विपद् आउनुअघिको अवस्थाको सचेतना गराउँदै विपदले पु-याउने असर न्यूनीकरण गर्न तत्काल खोज, उद्धार र राहतसँगै समन्वयात्मक भूमिकाका लागि स्वंसेवक अत्यावश्यक हुने बताउनुभयो ।
प्रजिअ ढकालले भन्नुभयो, “सुरक्षाकर्मी पुग्न नसक्ने अवस्थामा स्थानीयस्तरमा रहेका स्वंयसेवकले विपद्पछिको अवस्थामा समन्वयात्मक भूमिकाको कार्य गर्न सक्छन्, यसबाट ठूलो क्षतिबाट बचाउन पनि सकिन्छ ।” कार्यक्रममा नगर उपप्रमुख गिता बञ्जाराले गत वर्षको असोज १०–१२ पछिको विपद्ले सिकाएको पाठ, भूकम्प तथा चट्याङ र गत वैशाखको वर्षाका कारण पु¥याएको क्षतिपछिको अवस्थाका बारेमा जानकारी गराउँदै सचेत रहन आग्रह गर्नुभयो ।
सो अवसरमा हेडक्वाटर प्रमुख प्रहरी उपरीक्षक प्रेम प्रसाइँले तालिमको उद्देश्यबारे प्रष्ट्याउँदै विपद्लगत्तैको प्रतिकार्यका लागि स्वयंसेवकलाई तालिमले सहजता दिलाउने बताउनुभयो । उहाँले जिल्लाका १३ वटै स्थानीय तहमा क्रमशः यससम्बन्धी तालिम प्रदान गर्दै जाने जानकारी दिनुभयो । तीन दिनसम्म सञ्चालन हुने तालिममा नेपाल रेडक्रस सोसाइटी काभ्रेपलाञ्चोक शाखाको प्राविधिक सहयोग गरेको छ ।
खुसी
दुःखी
अचम्मित
उत्साहित
आक्रोशित
