प्रधानसेनापति अशोकराज सिग्देलले बडादसैँका अवसरमा नेपाली सेनाद्वारा सैनिक मञ्च टुँडिखेलमा आगामी बिहीबार आयोजना हुने फूलपाती बढाइँ तयारीको आज निरीक्षण गर्नुभएको छ ।
त्यसअवसरमा उहाँले नेपाली सेना स्वास्थ्य विज्ञान संस्थान र इञ्जिनियर तालिम शिक्षालयलाई युनिट झण्डा हस्तान्तरण गर्नुभयो ।
प्रधानसेनापति सिग्देलले विशेष फौज बाहिनीद्वारा यस वर्ष सञ्चालित युद्धकार्य तथा पेसागत प्रतियोगितामा नेभिगेसन र वेस्ट स्नाइपर दुवै विधामा प्रथम हुने महावीर शौर्य गण (रेन्जर) लाई पुरस्कार प्रदान गर्नुभयो ।
त्यस्तै गत वर्षको महाशिवरात्रि तथा सेना दिवसमा लोपोन्मुख थाली नाच विश्व कीर्तिमान कायम गरेबापत वल्र्ड बुक अफ रेकर्डका तर्फबाट सेनालाई प्रमाणपत्र हस्तान्तरण गरियो । सोही अवसरमा वल्र्ड बुक अफ रेकर्डका नेपालस्थित निर्णायकलाई प्रशंसा पत्र प्रदान गरियो ।
त्यसअवसरमा विकट भौगोलिक अवस्था तथा चुनौतीपूर्ण मौसमी वातावरणमा प्रकृति संरक्षणमा महत्त्वपूर्ण योगदान गर्ने सकलदर्जालाई प्रकृति संरक्षण पदकबाट सुशोभित गरियो ।
यस वर्ष एक हजार पाँच सय १३ जना सकलदर्जाले उक्त पदक प्राप्त गरेको सैनिक जनसम्पर्क तथा सूचना निर्देशनालयले जनाएको छ । यस्तै सङ्गठनमा विशिष्ट योगदान पुर्याउने मानार्थ उपसेनानीमा पदोन्नति भएका ४२ पदिलाई दज्र्यानी चिह्न प्रदान गरियो ।
खुसी
दुःखी
अचम्मित
उत्साहित
आक्रोशित
