काभ्रेपलाञ्चोक/मुटुरोगजस्तो बढ्दो सार्वजनिक स्वास्थ्य चुनौतीबीच समुदायस्तरमै जनचेतना विस्तार गर्ने उद्देश्यसहित नेपाल हृदय रोग निवारण प्रतिष्ठान काभ्रे जिल्ला शाखाले आफ्नो ३२औँ स्थापना दिवस तथा ३१औँ वार्षिक साधारण सभा सम्पन्न गरेको छ।
बनेपास्थित कायस्थ बैनक्वेटमा आयोजित कार्यक्रममा प्रतिष्ठानका सभापति टीकाभक्त भोछिभोयको सभापतित्व र केन्द्रीय अध्यक्ष तथा वरिष्ठ मुटुरोग विशेषज्ञ डा. सत्यनारायण सुवाल को प्रमुख आतिथ्यता रहेको थियो।
कार्यक्रममा बोल्दै प्रमुख अतिथि सुवालले नेपालमा मुटुरोगको बढ्दो जोखिम न्यूनीकरणका लागि समुदायस्तरमा सचेतना, नियमित परीक्षण र जीवनशैली सुधार अपरिहार्य रहेको उल्लेख गरे। उनले स्थानीय तह, स्वास्थ्य संस्था र नागरिकबीचको सहकार्यलाई अझ सुदृढ गर्नुपर्नेमा जोड दिए।
वरिष्ठ बाल मुटुरोग विशेषज्ञ डा. अनिस जोशी ले बाथ मुटुरोग (Rheumatic Heart Disease) अझै पनि ग्रामीण क्षेत्रमा चुनौतीकै रूपमा रहेको उल्लेख गर्दै विद्यालयस्तरदेखि नै रोकथामका कार्यक्रम आवश्यक रहेको बताए। प्रतिष्ठानले सञ्चालन गर्दै आएका सचेतनामूलक अभियान, स्वास्थ्य शिविर तथा साझेदारी कार्यक्रमले सकारात्मक प्रभाव पारिरहेको उनको भनाइ थियो।
कार्यक्रमको सुरुवातमा उपसभापति ग्रोबेन् तौजलेले स्वागत मन्तव्य राख्दै लामो समयदेखि रोकिएको प्रतिष्ठानको भवन निर्माण कार्य पुनः सुचारु हुने जानकारी दिए। उनले दाताहरूलाई प्रतिबद्ध सहयोग रकम उपलब्ध गराउन आग्रह गर्दै आगामी दिनमा सेवा विस्तारको योजना पनि सार्वजनिक गरे।
सचिव हरिशरण श्रेष्ठले वार्षिक प्रतिवेदन प्रस्तुत गर्दै विगत वर्षमा सञ्चालन भएका स्वास्थ्य शिक्षा कार्यक्रम, शिविर तथा साझेदारी गतिविधिबारे जानकारी दिए। कोषाध्यक्ष राम प्यारी श्रेष्ठले आर्थिक पारदर्शितामा जोड दिँदै वित्तीय प्रतिवेदन प्रस्तुत गरेका थिए।
कार्यक्रमको प्रमुख आकर्षणका रूपमा स्वास्थ्य र शिक्षाक्षेत्रमा योगदान पुर्याउने व्यक्तित्वहरूलाई सम्मान गरिएको थियो।
“श्री विमल लाल सिकु श्रेष्ठ स्मृति स्वास्थ्य सम्मान” सिर मेमोरियल अस्पतालमा कार्यरत चिकित्सक डा. विद्या कोख श्रेष्ठ प्रधानाङ्गलाई प्रदान गरिएको थियो। त्यस्तै, शिक्षा क्षेत्रमा योगदानका लागि इन्द्रेश्वर माध्यमिक विद्यालय पनौतीका शिक्षक माधव प्रसाद अधिकारी र बनेपा आधारभूत विद्यालयका शिक्षक नारायण प्रसाद वैद्यलाई “श्री विमल लाल सिकु श्रेष्ठ स्मृति शिक्षा सम्मान” प्रदान गरिएको थियो।
त्यसैगरी “विष्णु माया रामेश्वर मकै श्रेष्ठ महिला स्वास्थ्यकर्मी पुरस्कार” शंखुपाटीचौर स्वास्थ्य चौकीकी अन्जु अधिकारीलाई प्रदान गरिएको थियो।
सम्मानित व्यक्तित्वहरूलाई प्रमुख अतिथि सुवालले सम्मानपत्र र नगद पुरस्कार प्रदान गरेका थिए भने सभापति भोछिभोयले दोसल्ला ओढाएर सम्मान गरेका थिए।
नेपालमा मुटुरोग मृत्युको प्रमुख कारणमध्ये एक बन्दै गइरहेको सन्दर्भमा यस्ता संस्थागत पहलले समुदायस्तरमा स्वास्थ्य साक्षरता बढाउन महत्त्वपूर्ण भूमिका खेल्ने स्वास्थ्य विज्ञहरू बताउँछन्।
प्रतिष्ठानले काभ्रे जिल्लामा विगत तीन दशकदेखि मुटुरोगसम्बन्धी जनचेतना, प्रारम्भिक पहिचान र रोकथामका कार्यक्रम सञ्चालन गर्दै आएको छ। साथै, हरेक वर्ष शिक्षा तथा स्वास्थ्य क्षेत्रमा योगदान पुर्याउने व्यक्तित्वलाई सम्मान गर्दै सामाजिक उत्तरदायित्वलाई निरन्तरता दिँदै आएको छ।
खुसी
दुःखी
अचम्मित
उत्साहित
आक्रोशित
