काठमाडौँ/ नेपाली कांग्रेसको आइतबारदेखि काठमाडौँको भृकुटीमण्डपमा सुरु भएको दोस्रो विशेष महाधिवेशनको पहिलो दिन कुल २ हजार ६ सय ६२ जना महाधिवेशन प्रतिनिधिले आफ्नो नाम दर्ता गराएका छन् ।
नेपाली कांग्रेसको १४ औँ महाधिवेशनमा कायम रहेका कुल ४ हजार ७ सय ४३ प्रतिनिधिमध्ये पहिलो दिन करिब ५६ प्रतिशत प्रतिनिधिहरूले नाम दर्ता गराएका हुन् । बहुमत सङ्ख्या पहिलो दिनमै दर्ता भएपछि आयोजक पक्ष उत्साहित देखिएको छ ।
विशेष महाधिवेशन सचिवालयका युवराज पाण्डेद्वारा आइतबार राति जारी प्रेस विज्ञप्ति अनुसार प्रदेशगत र संगठनगत रूपमा छुट्टाछुट्टै दर्ता स्टलहरूको व्यवस्था गरिएको थियो ।
प्राप्त तथ्याङ्क अनुसार मधेस प्रदेशबाट सबैभन्दा बढी ४ सय ४६ जना प्रतिनिधिले नाम दर्ता गराएका छन् । त्यसैगरी बागमती प्रदेशबाट ४ सय ३२ र कोशी प्रदेशबाट ४ सय २५ जना प्रतिनिधिको सहभागिता रहेको छ ।
लुम्बिनी प्रदेशबाट ३ सय ९८ जना प्रतिनिधि सहभागी हुँदा गण्डकी प्रदेशबाट २ सय ९६ जनाले नाम दर्ता गराएका छन् । भौगोलिक रूपमा टाढा रहेका सुदूरपश्चिम प्रदेशबाट १ सय ५८ र कर्णाली प्रदेशबाट १ सय ३४ जना प्रतिनिधि काठमाडौँ आइपुगेका छन् ।
यसैगरी, काठमाडौँ उपत्यकाबाट १ सय ७८ जना र पार्टीका विभिन्न भातृ, शुभेच्छुक एवं विदेशस्थित जनसम्पर्क समितिहरूबाट १ सय ९५ जना प्रतिनिधिले आफ्नो उपस्थिति दर्ता गराएका छन् ।
बाँकी रहेका र आउने क्रममा रहेका प्रतिनिधिहरूका लागि सोमबार बिहान ८ बजेदेखि पुनः दर्ता प्रक्रिया सुरु गरिने पाण्डेले जानकारी दिए ।
पार्टी सभापति शेरबहादुर देउवा पक्षले यो महाधिवेशनलाई वैधानिकता दिन अस्वीकार गरिरहेका महामन्त्रीद्वय गगन थापा र विश्वप्रकाश शर्माको अनुवाइमा विशेष महाधिवेशन भएको हो ।
खुसी
दुःखी
अचम्मित
उत्साहित
आक्रोशित
