सिन्धुपाल्चोक / नेपाली काँग्रेसका नेता मोहनबहादुर बस्नेतले निर्वाचनबाट मात्रै देशमा राजनीतिक निकास सम्भव हुने बताएका छन् ।
नेपाली काँग्रेस सिन्धुपाल्चोक क्षेत्र नं १ द्वारा शुक्रबार बाह्रबिसेमा आयोजित बृहत् चुनाव तयारी सभामा उनले फागुन २१ गते हुने निर्वाचनलाई पार्टीले आत्मसात् गरेको भन्दै सरकारले निर्वाचनको वातावरण बनाउनुपर्नेमा जोड दिए । “जेन जेड आन्दोलनपछि मुलुक जटिल परिस्थितिमा छ, यस्तो अवस्थामा निकासका बाटो भनेकै निर्वाचन हो । हाम्रो पार्टीले औपचारिक निर्णय गरेर निर्वाचनमा जाने भनेको छ, अब सरकारले अलमल नगरी चुनावको वातावरण बनाउनुपर्छ”, नेता बस्नेतले भने ।
उनले नेपालको संविधानले शिक्षा र स्वास्थ्यलाई नागरिकको मौलिक हकका रूपमा व्यवस्था गरेकाले त्यसको नि:शुल्क व्यवस्था गरिनुपर्नेमा जोड दिए । आफूले स्थानीय जनताको आवश्यकताका आधारमा सधैँ विकासको राजनीति गरिरहेको र आगामी दिनमा पनि त्यसमा क्रियाशील रहने प्रतिबद्धता जनाए ।
पार्टीका जिल्ला सचिव भक्त ध्वज बोहराले फागुन २१ गतेको लागि घोषणा भएको निर्वाचनका लागि आयोजना गरेको सभा देशभरकै पहिलो रहेको बताए। उनले निर्वाचनमा हार र जितभन्दा पनि जनताप्रतिको विश्वासलाई पार्टीले पहिलो प्राथमिकतामा राखेको बताए ।
महासमिति सदस्य डा. प्रेम ध्वज लामा र भोला बोहरा, नेता यास्मिन ढुंगाना, जिल्ला उपसभापति दोर्जे लामा, पूर्व जिल्ला सभापति भूपेन्द्रबहादुर थापा, सिन्धुपाल्चोक क्षेत्र नं २ का सचिव विष्णु घोरासैनी, मेलम्ची नगर सभापति वसन्त गुरुङ, बलेफी गाउँपालिकाका पूर्वअध्यक्ष केदार क्षेत्री, नेपाल महिला संघका केन्द्रीय सदस्य मञ्जु नेपाल भण्डारी, क्षेत्र नं १ का सचिव सञ्चवीर तामाङलगायतले आफ्नो धारणा राखेका छन् ।
खुसी
दुःखी
अचम्मित
उत्साहित
आक्रोशित
