काठमाडौँ/ राजधानीको उत्तरपूर्वी भागमा रहेको कागेश्वरी मनोहरा नगरपालिका–१ स्थित कागेश्वरी मन्दिरमा भक्तजनले पूजा आराधना एवं दर्शन गरेका छन् । प्रत्येक वर्ष भाद्र शुक्ल अष्टमीका दिन मनाइने कागे अष्टमी पर्वका अवसरमा आज यहाँ भक्तजनले पूजा आराधना एवं दर्शन गरेका हुन् ।
मन्दिरमा बिहानैदेखि भक्तजनको घुइँचो लागेको थियो । कागेश्वरीमा हरियो मकै चढाएमा कागले बारीमा लगाएको मकै नखाने धार्मिक विश्वाससमेत रहेको छ । श्रावण शुक्ल पूर्णिमा र गङ्गा दशहरा पर्वका अवसरमा रसुवाको प्रसिद्ध धार्मिकस्थल गोसाइँकुण्डमा पुगेका भक्तजनले त्यहाँबाट ल्याएको जल आज कागेश्वरीमा चढाउनुपर्छ भन्ने मान्यतासमेत छ ।
शिवपुरी नागार्जुन राष्ट्रिय निकुञ्जसँग जोडिएको ऐतिहासिक, धार्मिक र पर्यटकीय दृष्टिले महत्वपूर्ण कागेश्वरी महादेव मन्दिरमा मेलासमेत लाग्छ । मन्दिरसम्म आवतजावत गर्न यातायातको सहज व्यवस्था गरिएको कागेश्वरी मनोहरा नगरपालिकाका नगर प्रमुख उपेन्द्र कार्कीले जानकारी दिनुभयो । मन्दिर परिसरमा हाल २२७ किलोको अष्टधातुबाट बनेको कागको मूर्ति विशेष आकर्षणका रूपमा रहेको छ । यहीँको लोकतान्त्रिक सहीद उद्यानमा एक हजार किलोको कागको मूर्ति निर्माण गरिएको छ ।
एक हजार किलोको अष्टधातुको कागको मूर्ति बनाउन स्थानीयवासीले धातु दान गरी सहयोग गरेका छन् । यसै मन्दिरसमेतको नाम जोडेर कागेश्वरी मनोहरा नगरपालिकाको नामकरण भएको हो । यस पर्वका अवसरमा नगरपालिकाले प्रत्येक वर्ष भाद्र शुक्ल अष्टमीका दिन नगरपालिकाभर सार्वजनिक बिदा दिँदै आएको छ ।
खुसी
दुःखी
अचम्मित
उत्साहित
आक्रोशित
