भक्तपुर/ नेपालमै पहिलो पटक स्थापना गरिएको गीताचार्य श्रीकृष्ण भगवानको विराटस्वरुप श्रीमूर्तिको श्रीकृष्ण जन्माष्टमीका अवसरमा आज प्राणप्रतिष्ठा गरिएको छ ।
चाँगुनारायण नगरपालिका-५ छालिङ गोकुलधामस्थित मच्छेनारायण एवं श्रीकृष्णवर्तेश्वर महादेव मन्दिर परिसरमा एउटै विशाल ढुङ्गाबाट निर्माण गरिएको २५ हजार ७७७ किलोग्राम तौलको श्रीकृष्ण भगवाणको विराट स्वरुप श्रीमूर्तिको आज शुभसाईतमा पूजा, हवन एवं प्राणप्रतिष्ठा गरिएको वडाध्यक्ष जयन्द्र खड्काले जानकारी दिनुभयो ।
चाँगुनारायण नगरपालिकाको सहकार्य एवं चाँगुनारायण-५ कार्यालय, श्री मच्छेनारायण, श्रीकृष्णवर्तेश्वर महादेव मन्दिर संरक्षण तथा विकास समितिले आयोजना गरेको उक्त धार्मिक अनुष्ठानमा सात जना ब्राम्हणले यही साउन २९ गतेदेखि तीन दिनसम्म विभिन्न पूजा, हवन गरी आज प्राणप्रतिष्ठा गरिएको हो ।
वडाध्यक्ष खड्काले भन्नुभयो, “तीन दिनसम्म तान्त्रिक विधिपूर्वक पूजा, होम एवं हवन सम्पन्न गरिएको छ । आज श्रीकृण जन्माष्टमीको दिन सात जना ब्राम्हणबाट प्राणप्रतिष्ठा भएको छ । आजदेखि विशाल श्रीकृष्ण विराट स्वरुप श्रीमूर्तिको अनावरण गरि आजभक्तजनको दर्शनको लागि खुला भएको छ ।”
नगरकोट भ्रमण वर्ष, २०८२ को अवसर पारेर आयोजना गरिएको यस कार्यक्रमले चाँगुनारायण नगरपालिका क्षेत्रको धार्मिक पर्यटनको विकासमा टेवा पु-याउने नगरप्रमुख जीवन खत्रीले बताउनुभयो ।
उहाँले भ्रमण वर्षकै अवसर पारेर ऐतिहासिक भूमिमा विशाल मूर्ति स्थापना गरेर ओझेलमा परेको यहाँको धार्मिक सम्पदा र पहिचानलाई हिन्दूधर्मावलम्वीहरुका लागि पवित्र तीर्थस्थल र अन्यका लागि पर्यटकीय आकर्षण हुने बताउनुभयो ।
स्थानीय गोकर्ण पुरीले आफूले भारत भ्रमणका क्रममा देखेको यस प्रकारको श्रीकृष्णको विशाल मूर्ति नेपालमा पहिलो पटक स्थापना गरेर यस क्षेत्रको ऐतिहासिक, धार्मिक महत्वलाई अझै उचाइमा पु¥याएको बताउनुभयो ।
चार सय बाह्र वर्ष अगाडि अर्थात् १६६९ मा स्थापना भएको मच्छेनारायण एवं श्रीकृष्ण वर्तेश्वर महादेव मन्दिर परिसरमै श्रीकृष्ण भगवाणको विराट स्वरुप श्रीमूर्तिको निर्माण गरिएको हो । यस मूर्तिमा विभिन्न देवीदेवताका मूर्तिहरुसँगै रहेका छन् भने महाभारतको युद्धमा श्रीकृष्णले अर्जुनलाई रथमा बसेर उपदेश दिँदाको क्षणलाई मूर्तिमा उतारिएको छ ।
चाँगुनारायण नगरपालिका, प्रदेश सरकारलगायत विभिन्न सरकारी निकायको बजेटबाट यस मन्दिर परिसरमा हनुमान, रामसीता, पलाञ्चोक भगवती, सरस्वती, मोक्ष विनायक गणेश, सप्तऋषि, ६४ शिवलिङ्ग, मल्लकालिन शैलीको पाटीलगायतका विभिन्न संरचनाहरु यसअघि निर्माण भएको स्थानीय नारायणप्रसाद पुरीले जानकारी दिनुभयो ।
मन्दिर परिसरमा कुण्डसहितको मच्छेनारायण मन्दिर, श्रीकृष्णवर्तश्वर महादेव मन्दिर, त्रिवेणीको रुपमा परिचित यस मन्दिरमा परुषोत्तम महिना, धान्यपूर्णिमा र कृष्ण जन्माष्टीमामा मेला लाग्दै आएको उहाँले जानकारी दिनुभयो ।
खुसी
दुःखी
अचम्मित
उत्साहित
आक्रोशित
