वरिष्ठ पत्रकार भैरव रिसालको निधन

काठमाडौं/वरिष्ठ पत्रकार भैरव रिसालको निधन भएको छ । ९७ वर्षीय पत्रकार रिसाल अस्वस्थ हुनुभएपछि आइतबार फ्रन्टलाईन अस्पताल बानेश्वर भर्ना गरिएको थियो ।

उहाँका भाइ पुरु रिसालका अनुसार उहाँको निधन साेही साँझ पौने ८ बजेतिर भएको हो । 

पछिल्लो समय फोक्सो र मुटु समस्याबाट ग्रसित वरिष्ठ पत्रकार रिसाल सूर्यविनायक नगरपालिका –४, दधिकोटमा बस्दै आउनुभएको थियो । उहाँका श्रीमती, दुई छोरा र दुई छोरी हुनुहुन्छ । 

पत्रकार रिसालले आफ्नो शरीर पाटन अस्पताललाई दान दिने घोषणा गर्नुभएकाले उहाँको दाहसंस्कार नगरिने वरिष्ठ पत्रकार तीर्थ कोइरालाले बताउनुभयो ।

वि.सं. १९८५ साउन २८ गते जन्मनुभएका पत्रकार रिसाल २०१३ सालदेखि पत्रकारिता क्षेत्रमा आवद्ध हुनुहुन्थ्यो । पत्रकार रिसाल नेपाली भूमि लिपुलेक र लिम्पियाधुरामा जनगणना काममा सहभागी हुनुभएको थियो । 

रेडियो सगरमाथामा लामो समय ‘उहिले बाजेका पालामा’ रेडियो शृङ्खला सञ्चालन गर्नु भएको थियो। वामपन्थी विचारधारा बोक्ने रिसाल २०४८ सालको आमनिर्वाचनमा नेपाल मजदुर किसान पार्टीका तर्फबाट भक्तपुरबाट उम्मेदवार बन्नु भएको थियो ।

वरिष्ठ पत्रकार रिसालले हालखबर पत्रिकामा चार वर्ष काम गर्नुभयो । २०१७ पछि उहाँको पत्रकारितामा २६ महिना अवरुद्ध भयो । उहाँले तथ्याङ्क विभागमा काम गर्नुभयो । यसक्रमममा उहाँ दार्चुलामा जनगणना गर्न जाने टोलीको प्रमुख हुनुभयो । कालापानी, लिपुलेक र लिम्पियाधुराको जनगणना गराउनुभएको उहाँ त्यो भूमि नेपालको हो भन्ने ऐतिहासिक तथ्य स्थापित गर्ने साक्षी हुनुहुन्थ्यो ।

वरिष्ठ पत्रकार रिसालले मानवअधिकारसम्बन्धी, जगदम्बा श्री र वातावरण संरक्षणसम्बन्धी विभिन्न पुरस्कार प्राप्त गर्नु भएको थियो।

२०२० मा राष्ट्रिय समाचार समितिमा प्रवेश गर्नु भएका वरिष्ठ पत्रकार रिसाल सुरुको चार वर्ष समाचारदाता र प्रमुख समाचारदाताको जिम्मेवारीमा काम गर्नुभएको थियो । २०४२ मा राससको जागिर छाड्नु भए पनि स्वास्थ्यले साथ दिइन्जेल उहाँले ‘श्रमिक’ साप्ताहिक तथा ‘मजदुर’ दैनिकमा नियमित स्तम्भ लेख्नुभयो ।

विभिन्न पुरस्कार एवं सम्मान प्राप्त गर्नुभएका रिसालका ‘साधुलाई सुली’ (जेल डायरी), ‘लोग्नेस्वास्नी’, ‘केही मित्रका चिठी’ कृति र ‘भैरव दाइ’लगायत पुस्तक प्रकाशित छन्।