२ अर्ब ९६ लाख रुपैयाँ बढी रकमको अनलाइन जुवा खेलाउने ११ जना भारतीयहरुलाई प्रहरीले समात्यो

काठमाडौं/ नेपाल प्रहरीले अनलाईन जुवा खेल्ने खेलाउने ठूलो गिरोहलाई नै आज पक्राउ गरेको छ ।

बुढानीलकण्ठ नगरपालिका वडा ३ देउला टोलस्थित घर भाडामा लिई भारतीय नागरिकहरुले अनलाइन जुवा (सट्टाबाजी) खेल्ने खेलाउने कार्य गरिरहेको भन्ने सूचनाका आधारमा प्रहरीले सर्च गरेको थियो ।

पछिल्लो समय अनलाईन र्फत जुवा खेलाउने खेल्ने कृयाकलाप बढ्दै गएको छ । विशेषगरी सोझा ब्यक्तिहरु यस्ता खेलहरुमा फसेर पैसा सक्ने गरेको प्रहरीको भनाई छ ।

उनीहरुलाई अनलाइन जुवा खेलिरहेको अवस्थामा नियन्त्रणमा लिई प्रारम्भिक अनुसन्धान गर्दा निजहरुले २ अर्व रुपैयाँ भन्दा बढी रकमको कारोवार हुनेगरी अनलाईन जुवा (सट्टेबाजी) खेलाउने कार्य गरेको भेटिएको थियो ।

प्रहरीले ९६ लाख ३३ हजार भन्दा बढी रकम बराबरको अभौतिक मुद्रा क्रिप्टो करेन्सीको कारोबार समेत गरेको देखिएको जनाएको छ ।

उनीहरुलाई काठमाडौ जिल्ला अदालतबाट ७ दिनको म्याद थप गरी अनुसन्धान गरिरहेको जिल्ला प्रहरी परिसर काठमाडौंका प्रहरी उपरिक्षक एवं सूचना अधिकारी अपीलराज बोहराले जानकारी दिएका छन् ।

उनीहरुको साथबाट विभिन्न कम्पनीको मोवाईल फोन ३४ थान, ल्यापटप ५ थान, हिसाबकिताबको अभिलेख राखिएको नोट बुक (कापी) ४ थान, भारतीय बैंक खाताको चेक बुक १४ थान, भारतीय एटिएम कार्ड २७, भारतीय सिमकार्ड ४० थान लगायत बरामद गरेको प्रहरीको भनाई छ ।