काठमाडौँ / सरकारले स्वास्थ्य बीमा बोर्डको कार्यकारी निर्देशक पदमा डा. रघुराज काफ्लेलाई नियुक्त गर्ने निर्णय गरेको छ। डा. काफ्ले स्वास्थ्य बिमा सुधार सुझाव कार्यदलका सदस्यसमेत हुन् ।
साेमबारको मन्त्रिपरिषद् बैठकले डा. काफ्लेलाई नियुक्त गर्ने निर्णय गरेको हो। कार्यकारी निर्देशक नियुक्त गर्न स्वास्थ्य मन्त्रालयले गत बुधबार मन्त्रिपरिषद् समक्ष प्रस्ताव पेस गरेको थियो।
समितिले आवेदन स्वीकृत भएका १० जना उम्मेदवारहरूमध्ये गत फागुन १८ र १९ गते प्रस्तुतीकरण तथा अन्तर्वार्ता लिई तीन जनाको नाम मन्त्रिपरिषदमा सिफारिस गरेको थियो। सिफारिस गरिएका नामहरूमा कमल पन्थी, डा. कृष्णप्रसाद अधिकारी र डा. रघुराज काफ्ले परेका थिए।
लामो समयदेखि प्रदेश, संघ र अन्तर्राष्ट्रिय विकास साझेदारहरूसँग सहकार्य गर्दै नीति निर्माणमा संलग्न रहँदै आएका उनी स्रोत परिचालन, समन्वय तथा सहकार्यमा विशेष दखल राख्छन्।
नेपाल सरकारका नीति निर्माण प्रक्रियामा लामो समयदेखि संलग्न रहँदै आएका उनले सधैँ नीति निर्माण र निर्णय तहमा प्रभावकारी भूमिका निर्वाह गरेका छन्।
करिब १२ वर्ष संयुक्त राष्ट्रसंघीय विकास कार्यक्रमको सहभागितात्मक जिल्ला विकास कार्यक्रम तथा संयुक्त राष्ट्रसंघीय बालकोषको महिला तथा बालबालिकासम्बन्धी विकेन्द्रित कार्यक्रमलगायतका विकास साझेदारका परियोजनाहरूमा जिल्ला टोली नेताको रूपमा कार्य गरेको उनीसँग अनुभव छ।
चार वर्ष वैदेशिक रोजगार बोर्डका कार्यकारी प्रमुख, १९ महिना गण्डकी प्रदेश नीति तथा योजना आयोगको उपाध्यक्षका रूपमा कार्यरत डा . काफ्लेले करिब १२ वर्ष विभिन्न क्याम्पसहरूमा स्नातक तथा स्नातकोत्तर तहका विद्यार्थीलाई अर्थशास्त्र तथा अनुसन्धान विषय अध्यापन गराएका उल्लेख छ ।
खुसी
दुःखी
अचम्मित
उत्साहित
आक्रोशित
