काठमाडौँ । काठमाडौँ महानगरले वडा नं. ८ जय वागेश्वरी, गायत्री मार्गमा मन्दिर उत्खनन भएको स्थानमा शास्त्रीय विधिविधानपूर्वक व्रह्मा मन्दिर पुनःनिर्माणको शिलान्यास गरेको छ ।
वडाध्यक्ष आशामान संगतले शिलान्यास गर्नुभएको सो मन्दिर हराएकै १ सय वर्षभन्दा धेरै भएको थियो । यसस्थानमा झाडी मात्र थियो ।
पुरातत्व विभागको सहयोगमा उत्खननपश्चात् यसको प्राचीनताको अध्ययन गरिएको थियो । यसबाट मन्दिर छैटौँ शताव्दी देखि सातौँ शताव्दीको विचमा निर्माण भएको अनुमान गरिएको छ ।
‘मन्दिरको वनावट र प्रकृति सम्बन्धी दस्तावेज नपाइए पछि हामीले जगको आकृति, प्रयोग भएको निर्माण सामग्रीका आधारमा पुरातत्वविदहरुबाट मन्दिरको रेखाङ्कन गराएका हौँ ।’ संगतले जानकारी दिनुभयो ।
उहाँका अनुसार मन्दिरको मूर्ति वर्षौँदेखि गौशाला प्रहरी कार्यालयमा रहेकोले उल्लेख गर्दै प्रहरी कार्यालयबाट मन्दिरमा सार्न हतार भइसकेको उल्लेख गर्नुभयो ।
सार्वजनिक खरिद प्रक्रियाबाट छानिएको निर्माण पक्षबाट मन्दिरको पुनःनिर्माण हुँदैछ । यसको लागत करिब १ करोड १५ लाख रुपैयाँ हो । आउँदो वर्षको साउन २६ भित्र पुनःनिर्माण सम्पन्न गर्ने गरी कामको जिम्मा दिइएको छ । माटो, इटा र काठको प्रयोगबाट निर्माण हुने मन्दिर दुई तलाको प्यागोडा शैलीको हुनेछ । मन्दिरमा शिरमा गजुर राखिनेछ ।
निर्माण कार्य गर्दा वडासँगै महानगरपालिकाको सम्पदा तथा पर्यटन विभाग, पशुपति क्षेत्र विकास कोष, पुरातत्व विभाग, स्थानीय समुदाय, संघसंस्थाहरुसँगको समन्वय गरिने पनि महानगरले जनाएको छ ।
खुसी
दुःखी
अचम्मित
उत्साहित
आक्रोशित
