काठमाडौँ/तमु ल्होसारको अवसर पार्दै फिल्म ‘ऊनको स्विटर’ को नयाँ गीत ‘मखमली’ बिहीबार सार्वजनिक गरिएको छ । ‘कौडा/चुट्का’ मा आधारित यस गीतमा प्रेम, वियोग, हास्यव्यंग्य, व्यथा र सामाजिक परिवेशलाई व्यक्त गरिएको छ ।
जसमा फिल्मका मुख्य जोडी विपिन कार्की र मिरुना मगरबीचको अव्यक्त प्रेमलाई दर्साइएको छ । गण्डक क्षेत्रमा चर्चित मानिने यो भाकालाई पूर्वी नेपालको पाँचथरको संस्कृतिमा आधारित उक्त फिल्ममा समावेश गरिएको हो ।
सुजन चापागाईं र सुनिता थेगिमको युगल गायन रहेको ‘मखमली’ को शब्द रचना हर्क साउद र संगीत गायक चापागाईंकै रहेको छ । दीप गुरुङले कोरियोग्राफी रहेको यस गीतको भिडियोमा अभिनेता विल्सनविक्रम राई पनि रहेका छन् ।
आगामी वैशाख २६ मा रिलिज हुने ‘ऊनको स्विटर’ लाई नवीन चौहानले निर्देशन गरेका हुन् । फिल्ममा विपिन, मिरुना र विल्सनसहित सुनिल पोखरेल, माओत्से गुरुङ, प्रेम सुब्बा, एलेक्स पारस, परीक्षा लिम्बू, सुरज तमू, शारदा देवी सिलवाल, भावना खपाङ्गी मगरलगायतको अभिनय रहेको छ ।
‘घुमी घुमी,’ ‘देखेर तिमीलाईः तीन पाते,’ ‘फूलथुङ्गे रानी,’ ‘चन्द्रमा’ जस्ता लोकलयमा आधारित ‘म्युजिकल फिल्म’ बनाएको आर्टमान्डूले पहिलो पटक फिल्म निर्माणका रूपमा ‘ऊनको स्विटर’ ल्याउन लागेको हो । फिल्मका संगीत निर्देशक पनि सुजन चापागाईं नै हुन् ।
खुसी
दुःखी
अचम्मित
उत्साहित
आक्रोशित