काठमाडौं/ गत असोजको बाढीपहिरोबाट क्षतिग्रस्त भएको काभ्रे उपत्यका एकीकृत खानेपानी आयोजनालाई पुनः सञ्चालनका लागि दाता एशियाली विकास बैंकलाई अनुरोध गरिएको छ ।
काभ्रे उपत्यका एकीकृत खानेपानी व्यवस्थापन बोर्डका अध्यक्ष एवं धुलिखेल नगरपालिकाका प्रमुख अशोककुमार ब्याञ्जु श्रेष्ठले आज बैंकका कन्ट्री डाइरेक्टर अर्नाउड कौकोइसलाई भेटेर अनुरोध पत्र हस्तान्तरण गरेका हुन् ।
बैंकका कन्ट्री अपरेसन्स हेड अर्नाउड हेक्म्यानसमेतको उपस्थितिमा बुझाएको पत्रमा असोज १०-१३ सम्मको बाढीपहिरोको कारण आयोजनामा २१ करोड ८० लाख रुपैंया बराबरको क्षति भएको उल्लेख छ ।
भेटघाटलगत्तै अध्यक्ष ब्याञ्जुले आफ्नो फेसबुक वालमा लेखेका छन्, ‘समस्याको जानकारी गराइयो । यो आयोजनाको सहयोग गर्ने वचन प्राप्त भएको छ । साथै पुनर्निर्माण कार्यलाई सहयोग गर्ने डिपिआर तयार गरिदिने र पुनर्निर्माण कार्यमा आर्थिक सहयोग पुर्याउने बचन प्राप्त भयो।’
आयोजनाका लागि ५० प्रतिशत ऋण व्यहोर्ने ऋणदाता एशियाली विकास बैंकले निर्माणमा ढिलाई हुँदै जाँदा २०१९ डिसेम्बर अन्तिमबाट हात झिकेको थियो ।
खुसी
दुःखी
अचम्मित
उत्साहित
आक्रोशित
