विपद प्रभावित दुइ सय ३८ परिवारलाई आर्थिक सहयोग
‘आपतकालीन राहत मार्फत स्थानीय श्रोत र पूर्वाधार पुनस्थापना परियोजना’ बाट शान्ति जनआदर्श सेवा केन्द्रले काभ्रेपलान्चोकको पनौती नगरपालिका र रोशी गाउँपालिकाका २ सय ३९ घरपरिवारलाइ नगद सहयोग गरेको छ।
असोज दोश्रो साता परेको अविरल वर्षाका कारण आएको बाढी र पहिरोका कारण क्षति भएका पनौती र रोशीका विपद प्रभावित घरपरिवारलाइ विपद उद्धार तथा राहत सम्बन्धि मापदण्ड अनुसार केन्द्रले आर्थिक सहयोग गरेको हो।
सरकारले तोकेको मापदण्डका आधारमा पाँचजना सदस्य भएका परिवारलाइ १५ हजार रुपैया र पाँचभन्दा बढी सदस्य भएका परिवारलाइ २० हजार रुपैया तत्काल राहत स्वरुप नगद सहयोग गरेको केन्द्रका अध्यक्ष शंखबुद्द लामाले जानकारी दिनुभयो । तत्काल राहत स्वरुप पनौती नगरपालिकाका १ सय ३१ परिवार र रोशी गाउँपालिकाका १ सय ८ गरि जम्मा २ सय ३९ घरपरिवारलाइ नगद सहयोग उपलब्ध गराइएको लामाले बताउनुभयो ।
युके एड, स्टार्ट फण्ड नेपाल, सिआरएस, एनएचएसआरपीसंगको सहकार्यमा संचालित परियोजनाको प्रगति तथा समन्वयात्मक छलफलमा शान्ति जनआदर्श सेवा केन्द्रले गरेका कामको प्रगतिको समिक्षा गरेको छ। बैठकमा हालसम्म गरेका गतिविधिको विवरण सार्वजनिक गरिएको छ।
कार्यकारी निर्देशक शान्तिलक्ष्मी श्रेष्ठका अनुसार संस्थाले विपदबाट धेरै प्रभावित पनौती र रोशीका क्षतिग्रस्त क्षेत्रमा ४५ दिने ‘र्यापिड रेस्पोन्स’ कार्यक्रम संचालन गरेको थियो। उक्त कार्यक्रम अनुसार पनौती र रोशीमा तत्काल राहत स्वरुप रकम हस्तान्तरण, क्षतिग्रस्त बिद्यालय एवं सामुदायिक भवनको सरसफाई र व्यवस्थापन, खानेपानीको मुहान सफाई र बाटो खोल्न स्वयंसेवक परिचालन गरेको थियो ।
समन्वयात्मक बैठकमा जिल्ला समन्वय समिति काभ्रेपलान्चोकका प्रमुख दिपक गौतम, पनौती नगरपालिकाका प्रमुख रामशरण भण्डारी, रोशी गाउँपालिकाका उपाध्यक्ष मिमबहादुर वाइबा, गैसस महासंघका प्रतिनिधि टोम सापकोटालगायतले विपदमा स्थानीय तहले गरेको कामको समिक्षासहित परोपकारी कामको चर्चा गरेका छन् ।
शुक्रवार सम्पन्न छलफलमा सम्बन्धित पालिकाका प्रमुख एवं उपप्रमुख, प्रमुख प्रशासकीय अधिकृत, वडाअध्यक्ष तथा सहयोगी संघसंस्थाका प्रतिनिधिहरु सहभागी थिए।
खुसी
दुःखी
अचम्मित
उत्साहित
आक्रोशित
