गैरआवासीय नेपाली संघ (एनआरएनए) ले पनौती-१, २, ३ र १२ मा हालैको बाढी, डुबान तथा पहिरोबाट प्रभावित ४ सय १ परिवारका लागि राहत सामग्री वितरण गरेको छ।
एनआरएनए अन्तर्राष्ट्रिय समन्वय परिषद्को आह्वान तथा राष्ट्रिय परिषद यूकेको आर्थिक सहयोगमा खाद्य सामग्री, म्याट्रेस, त्रिपाल, सोलार बत्ती, प्राथमिक उपचार बक्सलगायतका राहत सामग्रीहरू वितरण गरिएको हो।
पनौती नगरपालिकासँगको समन्वयपश्चात् वडा नं १ का १२३ परिवार, वडा नं २ का ५३ परिवार, वडा नं ३ का २५ परिवार र वडा नं १२ का २०० परिवारलाई राहत वितरण गरिएको एनआरएनए सचिवालयले जानकारी दिएको छ।
एनआरएनएका अध्यक्ष डा. बद्री केसीको नेतृत्वमा संघको तर्फबाट गएको टोलीमा उपाध्यक्षद्वय रामशरण सिम्खडा र रोजिना प्रधानलगायत पदाधिकारी तथा केन्द्रीय सदस्यहरू सहभागी थिए।
राहत वितरणपश्चात् नेपालमा समस्या परेका बेला विदेशमा बस्ने नेपालीले गरेको सहयोगका लागि सांसद गोकुल बाँस्कोटाले धन्यवाद दिएका थिए।
यसअघि एनआरएनएले अविरल वर्षापछि आएको बाढी, डुबान तथा पहिरो प्रभावितका लागि १ करोड सहयोग गर्ने घोषणा गरेको थियो।जसअनुसार एनसीसी यूकेले १५ लाख सहयोग गरेको थियो।
एनआरएनए अध्यक्ष डा बद्री केसी नेतृत्वको टोलीले दक्षिणकाली र सिस्नेरी क्षेत्रमा राहत वितरण गरिसकेको छ भने बुधबार ललितपुर ठोस्नेखोलामा राहत वितरण गर्ने एनआरएनएले जनाएको छ।
तराईका विभिन्न जिल्लामा पनि राहत वितरणका लागि स्थानीय तहसँग समन्वय भइरहेको एनआरएनए सचिवालयले बताएको छ।
खुसी
दुःखी
अचम्मित
उत्साहित
आक्रोशित
