काठमाडौं – घरेलु मैदानमा जारी काभा महिला भलिबल नेसन्स लिगमा आज नेपाल र भारतबिच प्रतिस्पर्धा हुदैंछ ।
त्रिपुरेश्वरस्थित राष्ट्रिय खेलकुद परिषद्को कभर्डहलमा हुने आजको पहिलो खेलमा यी दुई टोली आमनेसामने हुन लागेका हुन् । यो खेल दिउँसो ३ बजेपछि सुरु हुनेछ ।
लिग चरणमा एक खेल मात्र खेलेको नेपालको खातामा ३ अंक मात्र छ । नेपालले लिगको उद्घाटन खेलमा श्रीलंकामाथि ३–० को सोझो सेटमा जित हात पारेको थियो ।
लिग चरणको दुई खेलमा अपराजित रहेको भारत ६ अंकमा तालिकाको शीर्ष स्थानमा छ । पहिलो खेलमा इरानमाथि ३–१ को सेटमा विजयी भएको भारतले लिग चरणको दोस्रो खेलमा मालदिभ्सलाई सोझो सेटमा पाखा लगाएको थियो ।
आजै हुने दोस्रो खेलमा इरान र मालदिभ्स खेल्नेछन् । सोही कभर्डहलमा हुने खेल साँझ सवा ५ बजे सुरु हुने तालिका छ ।
५ टोली सहभागी लिगको राउण्ड रोविनपछि शीर्ष चारमा रहने टोलीले सेमिफाइनल खेल्नेछन् । पुछारको टोली बाहिरिनेछ ।
अंक तालिकाको शीर्ष र चौथो स्थानमा रहने टोलीले सेमिफाइनल खेल्नेछन् । यस्तै दोस्रो र तेस्रो स्थानमा रहने टोली फाइनल प्रवेशका लागि खेल्नेछन् ।
दुई सेमिफाइनलका विजेताले उपाधिका लागि खेल्दै पराजित हुने टोलीले भने तेस्रो स्थानका लागि खेल्नेछन् ।
खुसी
दुःखी
अचम्मित
उत्साहित
आक्रोशित
