काठमाडौँ। संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नेपाल एयरलाइन्समा जहाज थप गर्ने विषय प्राथमिकताका साथ अघि बढेको जानकारी दिनुभएको छ ।
राष्ट्रियसभाको आजको बैठकमा सभा सदस्यहरूको जिज्ञासाको जवाफ दिँदै उहाँले नेपाल एयरलाइन्सलाई प्रतिस्पर्धी र व्यावसायिक संस्थामा रूपान्तरण गर्न व्यवस्थापन सुधारको कामसमेत प्राथमिकताका साथ अघि बढेको समेत बताउनुभयो ।
“नेपाल एयरलाइन्समा अन्तरराष्ट्रिय तथा आन्तरिक उडानका लागि अन्तरराष्ट्रिय लिज तथा प्रदेशसँगको सहकार्यमा पारदर्शी र खुला प्रक्रियाद्वारा जहाजहरू थप गर्न आवश्यक प्रक्रिया अघि बढाइएको छ”, मन्त्री पाण्डेले भन्नुभयो ।
मन्त्री पाण्डेले देशभरका विभिन्न विमानस्थलको अवस्थाबारे सभालाई जानकारी दिनुभयो । गौतमबुद्ध अन्तरराष्ट्रिय विमानस्थलमा क्रमशः अन्तरराष्ट्रिय उडानको सङ्ख्या वृद्धि भइरहेको र आन्तरिक उडान सङ्ख्यामा समेत उल्लेख्य वृद्धि भएको उहाँको भनाइ थियो ।
“दाङको टरीगाउँ विमानस्थलको स्तरोन्नति तथा विकासका लागि नेपाल नागरिक उड्डयन प्राधिकरणबाट आवश्यक अध्ययन तथा पूर्वतयारी भइरहेको छ”, मन्त्री पाण्डले भन्नुभयो, “निजगढ अन्तरराष्ट्रिय विमानस्थलको निर्माण तथा सञ्चालन ढाँचा स्पष्ट गरी कार्य अघि बढाइने छ ।”
यस्तै, सुर्खेत विमानस्थलको स्तरोन्नति तथा विस्तारका लागि नेपाल नागरिक उड्डयन प्राधिकरणबाट आवश्यक अध्ययन तथा पूर्वतयारी भइरहेको उहाँले जानकारी दिनुभयो । त्यसका लागि प्राधिकरणमार्फत आवश्यक बजेट परिचालन भई कार्य अघि बढ्नेसमेत मन्त्री पाण्डले बताउनुभयो ।
यसैगरी उहाँले सबै धर्मावलम्बीका आस्थाका प्रतीकको संरक्षण र सम्भारमा उचित ध्यान दिने प्रतिबद्धता व्यक्त गर्नुभयो । बृहत्तर लुम्बिनी गुरुयोजनाअनुरूपका कार्यहरू सम्पन्न गर्न मन्त्रालय र कोषको सहकार्यमा कार्य भइरहेको मन्त्री पाण्डले जानकारी दिनुभयो ।
सगरमाथा हेरिटेज ट्रेलमा बजेट विनियोजन भई निरन्तर कार्य भइरहेको जानकारी दिँदै उहाँले दोलखा पदमार्ग, मन्दिर तथा गुम्बाहरूको संरक्षणलगायत पूर्वाधारमा बजेट विनियोजन भएको उहाँले जानकारी गराउनुभयो ।
पर्यटकीय गन्तव्यलाई गुणस्तरीय र आकर्षक बनाउन रु तीन करोडमाथिका योजनालाई प्राथमिकता दिई कार्यान्वनयनमा लगिनेसमेत मन्त्री पाण्डेको भनाइ थियो ।
यस्तै, कैलालीको गौरीफन्टालगायत सबै नाकाबाट आउने पर्यटकीय सेवाका सवारीसाधनलाई सहज आगमनको व्यवस्था मिलाउन गृह मन्त्रालय र अर्थ मन्त्रालयलगायत निकायसँगको समन्वयमा काम भइरहेको उहाँले सभालाई जानकारी दिनुभयो ।
“यसका साथै सबै धार्मिक तथा पर्यटकीय क्षेत्रहरूको संरक्षण र प्रवर्द्धनमा स्थानीय तह, प्रदेश, सङ्घीय सरकार र निजी क्षेत्रको सहकार्यलाई प्राथमिकताका साथ पालना गर्न हामी प्रतिबद्ध छौँ”, मन्त्री पाण्डेले भन्नुभयो,“होटल तथा रिसोर्टलाई उद्योगको क्षेत्रमा वर्गीकृत गरी यसमा लगानी, रोजगारीजस्ता अर्थतन्त्रका महत्त्वपूर्ण क्षेत्रमा योगदान अभिवृद्धि गर्नेगरी राज्यबाट नीतिगत व्यवस्था भएको छ ।”
यस्तै, नेपाल पर्यटन बोर्ड, मन्त्रालय, निजी क्षेत्र, कूटनीतिक नियोग तथा नेपालीहरूको ‘डायस्पोरा’मार्फत पर्यटन प्रवर्द्धनका काम भइरहेका उहाँले जानकारी दिनुभयो ।
सभाको अर्को बैठक यही असार १८ गते बुधबार बिहान ११ बजेर १५ मिनेटमा बस्नेछ ।
खुसी
दुःखी
अचम्मित
उत्साहित
आक्रोशित
