‘कनेक्ट किसान’ एप ५ हजारभन्दा बढी पटक डाउनलोड भइसकेको
काठमाडौँ । प्रधानमन्त्री केपी शर्मा ओलीले नेपाली कृषकहरूका लागि निर्माण गरिएको ‘कनेक्ट किसान’को एआई (कृत्रिम बुद्धिमत्ता) सल्लाह प्रणाली परीक्षण गर्दा यसले दिएको वैज्ञानिक उत्तरबाट प्रभावित देखिए ।
बागबजारस्थित आइडिया स्टुडियोमा आयोजित ‘नवप्रवर्तक युवाहरूसँग प्रधानमन्त्री’ कार्यक्रममा उनले “कफि सुकाउने तरिका के हो ?” भनेर सोध्दा, प्रणालीले व्यावहारिक तरिकाले उत्तर दिएको थियो ।
प्रणालीले भन्यो, “कफिका फलहरू सफा गरेर चिसो र हावा लाग्ने स्थानमा पातलो तहमा राख्नुपर्छ । फलहरू नियमित रूपमा पल्टाउँदै राम्रोसँग सुकाउनु उपयुक्त हुन्छ, जसले गुणस्तरीय उत्पादन सुनिश्चित गर्छ ।”
‘कनेक्ट किसान’का निर्देशक राजन दाहालका अनुसार यो एआई प्रणालीले कृषकहरूलाई नेपाली भाषामा आवाज र पाठ दुवै माध्यमबाट कृषि सल्लाह दिन सक्छ । ह्वाट्सएप +977970-5919010जस्ता माध्यम प्रयोग गरेर किसानहरूले सजिलै आफ्नो समस्या पठाउन सक्छन्, र प्रणालीले उत्तर दिन्छ ।
यो प्रविधि ग्रामीण क्षेत्रका किसानहरूलाई लक्षित गरी विकसित गरिएको हो, जसमा इन्टरनेट पहुँच सीमित भए पनि सेवा प्रयोग गर्न सकिने बनाइएको छ । प्रणालीलाई नेपाली कम्पनी ‘दियो एआई’को सहयोगमा विकास गरिएको हो ।
सल्लाह प्रणालीले बाली संरक्षण, मलको मात्रा, रोग नियन्त्रण, सिँचाइ, तथा बजार मूल्य सम्बन्धी जानकारी पनि दिन सक्छ ।
हालसम्म ‘कनेक्ट किसान’ एप ५ हजारभन्दा बढी पटक डाउनलोड भइसकेको छ ।
खुसी
दुःखी
अचम्मित
उत्साहित
आक्रोशित
